ثقافة : اعرف.. قصيدة أحمد صابر عبد العظيم فى ملتقى بيت الشعر للنص الجديد

نافذة على العالم - يستعد بيت الشعر العربى، بإدارة الشاعر سامح محجوب، على مدار يومى 17 و18 مايو لتقديم (ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، ويقوم "اليوم السابع" بنشر قصائد الشعراء تباعًا.

بيت الشعر العربي

اعرف
ان انت زمان
لما اتكعبلت في طرف الفستان الفوشيه
مكانتش مصادفه
ودي ألوان عمرك ما تشوفها في ارض بلادك
ولا هتصادف زيها تاني
إكمن بلدكم خضرا
وطينها الطيب ما يكعبلش الناس
يوميها اتطاولت عينك عالتفاحه
وبنيت لعنيك الصرح عشان ترتقي اسباب
وتشوف النور
البنت ستارة جميلة
كان يكفيك ترسمها
ليه بس فضولك خانك
واتعشمت خلودها
انسان محدود زيك
فلاح من كوم برسيم بيلون غيط عمره بساطه
كان قدره يلوث فطرته بالألوان
وعشان فنان بيحب الرسم
شاف عمره تجارب
وريشات إفرانجي وطيف تصاوير
وعشان رهاناتك خسرت
إخترت تراهن عالخسرانه
واتحديت المبدأ
ان الدور التاني بيبدأ
بعد ما ملك اللعبة يموت
وان الفستان الفوشيه يليق عالغيط
وان تفاهة المدن الزحمة
تفهم لغة الطين في بلدكم
وان فراش الارض جماله
يعجب ابن  البندر
وان جناين قلبك بس تساع البنت
مش عارف امتا هتفهم
لكن اعرف
ان الماده بتحكم
ان خيالك جوا الحسبه
سالب صفر
وان اللون الغربي بيبهت حتى عليك
اعرف
ان السايد مهما تحاول تصرخ فيه
وتدل الناس على قبحه
برضه هيفضل هو السايد
وانك حق
علشان كده مكروه
وهتفضل خايب

طيب زي ما صبغك ضي الشمس
مبدع زي الفلاح اللي بيرسم لوحة الارض سماد مش ريش
والطلة في وشك تسعد
كأن الخالق صاغك ارض وطين

إعرف يا صديق العمر
الدنيا بتهرب منك فين

أحمد صابر

خريج كلية الآداب قسم علم اجتماع، له تحت الطبع ديوان " آخر تسبيحة فى حضن الموت.